Dinika stratejika niarahana tamin’ny fikambanambe iraisam-pirenena

𝗟𝗮𝗽𝗮𝗻’𝗶 𝗠𝗮𝗵𝗮𝘇𝗼𝗮𝗿𝗶𝘃𝗼, 𝗻𝘆 𝟮𝟯 𝗳𝗲𝗯𝗿𝗼𝗮𝗿𝘆 𝟮𝟬𝟮𝟰 – Notanterahina androany teo ambany fitarihan’ny Praiminisitra, Lehiben’ny Governemanta, Ntsay Christian sy ny Mpandrindra maharitry ny asan’ireo sampan-draharahan’ny Firenena Mikambana, Andriamatoa Issa Sanogo, ny fiaraha-midinika voalohany amin’ity taona 2024 ity, teo amin’ny Governemanta sy ny mpiara-miombon’antoka amin’ny fampandrosoana an’i Madagasikara.
Hevi-dehibe roa no niaraha-nidinika sy nifanakalozan-kevitra, dia momba ny Politika ankapoben’ny fanjakana sy ny Fifidianana ho avy.
Nanambara ny Praiminisitra fa vonona hanohana ny fanatanterahana ny Politika ankapoben’ny Fanjakana ny mpiara-miombon’antoka amintsika satria mifandraika amin’ny zavatra tanjon’izy ireo ny laharam-pahamehana napetraky ny fitondram-panjakana Malagasy izay tarihin’ny Filohan’ny Repoblika Andry Rajoelina. Vonona hanome tan-tsoroka ihany koa, amin’ny fanatanterahana ny fifidianana ho avy toy ny efa nataony tamin’ny fifidianana filoham-pirenena farany teo, izy ireo. Amin’ny maha firenena demokratika antsika, dia ny fifidianana ihany no ahafahantsika manome fahefana ny solontenan’ny vahoaka hoy hatrany ny Praiminisitra.
Notsipihiny fa niara-nahatsapa ny rehetra fa ilaina ny fifanakalozan-kevitra toy izao, izay hanatsarana hatrany ny fifandraisana misy eo amin’ny fianakaviambe iraisam-pirenena sy Madagasikara.
𝗡𝘆 𝗦𝗲𝗿𝗮𝘀𝗲𝗿𝗮

Vous aimerez aussi...