𝗙𝗶𝗵𝗮𝗼𝗻𝗮𝗻’𝗻𝘆 𝗠𝗶𝗻𝗶𝘀𝗶𝘁𝗿𝗮 𝗗𝗮𝘃𝗶𝗱 𝗥𝗔𝗟𝗔𝗠𝗕𝗢𝗙𝗜𝗥𝗜𝗡𝗚𝗔 𝘁𝗮𝗺𝗶𝗻’𝗻𝘆 𝗔𝗺𝗯𝗮𝘀𝗮𝗱𝗮𝗼𝗿𝗼𝗻’𝗶 𝗝𝗮𝗽𝗼𝗻 𝗔𝗕𝗘 𝗞𝗼𝗷𝗶 𝗵𝗮𝗻𝗮𝘁𝘀𝗮𝗿𝗮𝗻𝗮 𝗻𝘆 𝗳𝗶𝗮𝗿𝗮𝗵𝗮-𝗺𝗶𝗮𝘀𝗮 𝗶𝗻𝗱𝗿𝗶𝗻𝗱𝗿𝗮 𝗮𝗺𝗶𝗻’𝗻𝘆 𝗳𝗮𝗺𝗽𝗶𝗮𝘀𝗮𝗺-𝗯𝗼𝗹𝗮 𝗷𝗮𝗽𝗼𝗻𝗲𝘆 𝗲𝘁𝗼 𝗠𝗮𝗱𝗮𝗴𝗮𝘀𝗶𝗸𝗮𝗿𝗮

Noraisin’ny Minisitry ny Fampiroboroboana ny indostria sy ny Varotra (MIC) David RALAMBOFIRINGA tetsy amin’ny birao fiasany Ambohidahy, androany Talata 17 Septambra 2024, ny Ambasadaoron’i Japon miasa eto Madagasikara sy Comores, ABE Koji. Fotoana izay namariparitan’ny roa tonta ny fomba hanamafisana ny fiaraha-miasa eo amin’ny fampiroboroboana ny indostria izay andry faharoan’ny fampandrosoana any Madagasikara araka ny Politika ankapoben’ny Fanjakana, ny varotra ary ny fifandraisana amin’ny sehatra tsy miankina.
Nambaran’ny Minisitra David RALAMBOFIRINGA fa nanohina azy ny fahitana ny elanelana misy raha tarafina amin’ny fandrosoan’i Indonésie sy i Chine izay vao notsidihany tsy ela akory izay. « Rehefa mahatsapa fa tratra aoriana dia tsy maintsy miasa sy mijery vahaolana na misy aza ny fahasahiranana », hoy izy tamin’ny Ambasadaoro japoney.
Resy lahatra ny Minisitra fa tsy maintsy hamafisina ny fifampitokisana hahasarika ireo mpampiasa vola ho avy eto amintsika. « Mila manazava, mitondra valin-teny, mifanakalo hevitra araka izay tratra ary mametraka mazava ny fitsipika manoloana ireo Lalàna samihafa izay misy », hoy ihany izy. Nisarika ny sain’ny japoney moa izy ho liana amin’ny sehatry ny sakafo mifototra amin’ny vokatry ny fambolena ahafahana manatratra ny tanjona fahavitan-tena ara-tsakafo.
Naneho ny fahavononany avy hatrany hanampy an’i Madagasikara ny Ambasadaoron’i Japon raha nilaza fa handresy lahatra an’ireo orinasa japoney efa miasa aty Afrika izy ho tonga eto Madagasikara. Atsy Afrika Atsimo sy Kenya moa no tena mahasarika ny ankamaroan’ireo mpampiasa vola japoney ireo.
Anisan’ny manintona ny mpandraharaha japoney eto Madagasikara amin’izao fotoana izao ny kakao any Ambanja.