𝐓oekarena eny ifotony

𝐍𝐚𝐦𝐩𝐚𝐡𝐚𝐟𝐚𝐧𝐭𝐚𝐫𝐢𝐧𝐚 𝐭𝐚𝐦𝐢𝐧’𝐧𝐲 𝐟𝐨𝐦𝐛𝐚 𝐨𝐟𝐢𝐬𝐢𝐚𝐥𝐲 𝐧𝐲 𝐓𝐞𝐭𝐢𝐤’𝐚𝐬𝐚 𝐅𝐚𝐧𝐨𝐧𝐝𝐫𝐨𝐚𝐧𝐚 𝐚𝐫𝐚-𝐣𝐞𝐨𝐠𝐫𝐚𝐟𝐢𝐤𝐚 𝐡𝐨 𝐟𝐚𝐦𝐩𝐚𝐧𝐝𝐫𝐨𝐬𝐨𝐚𝐧𝐚 𝐧𝐲 𝐟𝐚𝐫𝐢𝐭𝐫𝐚

Miankina amin’ny fampandrosoana mirindra eo amin’ny faritra tsirairay ny fitomboana maharitra eo amin’ny toekarentsika. Nizara ny lalan-tsaina maha-zava-dehibe ny Fanondroana ara-jeografika (Indication géographique) ny Minisitra David RALAMBOFIRINGA nandritra ny fampahafantarana tamin’ny fomba ofisialy ny Tetik’asa teny amin’ny Panorama Andrianarivo. Hanampy betsaka amin’ny Fampiroboroboana ny indostria sy ny fanodinana ara-toekarena izay Andry faharoan’ny fampandrosoana an’i Madagasikara araka ny Politika ankapoben’ny Fanjakana koa ny Fanondroana ara-jeografika.
“Tena ilaina ny mamantatra izay mampiavaka manokana ny faritra tsirairay, ny tanjaka ara-toekareny ahafahana mitrandraka izany anaty paik’ady sy hitondra tombontsoa eo amin’ny toekarem-pirenena”, hoy ny Minisitry ny Fampiroboroboana ny indostria sy ny Varotra (MIC) nandritra ny lahateny fanokafana ny lanonana. Hanampy ny mpamboly amin’ny famoahana ny vokatra sy amin’ny fitadiavana lalam-barotra tsara kokoa sady manome lanja ny vokatra vokarina ao amin’ny Distrika amin’ny alalan’ny fanondroana ara-jeografika ny tetik’asa, satria mampitombo ny vidin’entana ny fisian’ny fahafantarana ny fiavian’ny vokatra iray. Voamarik’ireo mpiara-miombon’antoka izay efa mametraka ity tetik’asa ity atsy Afrika ka nazahoan’ireo firenena tsirairay avy tombontsoa izany. “Ity tetik’asa ity dia tohanan’ny Minisitera 100% satria manatsara ary mitondra antsika amin’ny fampandrosoana ara-toekarena”, hoy ny Minisitra David RALAMBOFIRINGA teny Andrainarivo.
Ho tanterahana mandritra ny 3 taona ny Tetik’asa Fanondroana ara-jeografika izay vatsian’ny AFD (Agence Française de Développement) vola. Mpiray antoka amin’ny fanatanterahana ny Tetik’asa kosa ny AIM, MIC, OMAPI ary ny CIRAD. Efa nisy ny fanaovan-tsonia talohan’izao ka natolotra azy ireo teny Andrainarivo ny atontan-taratasy momba izany.
Ho atao vaindohan-draharaha ny fandrafetana ny Lalàna sy ny paikady ary ny fomba fitantanana ahafahana miaro sy manome lanja ireo vokatra mampiavaka ny isam-paritra. Hisy ny fampahafantarana sy fifampiresahana amin’ireo mpisehatra sy ireo mpanao lalàna mba handaniana ilay Lalàna amin’ny fivorian’ny Antenimiera mpanao lalàna, hoy ny Tale mpanatanteraky ny (AIM) Rivo ADRIATSIMATAHOMANANA.