Tetik’asa fampandrosoana ny fanodinana ara-indostria ny vokatry ny fambolena any amin’ny faritra atsimo andrefana (PTASO)
Miroso hatrany ny fanatanterahana ny tetik’asa PTASO izay vatsian’ny Banky Afrikanina ho an’ny Fampandrosoana (BAD) vola ho fampiroboroboana ny indostria ara-pambolena miaraka amin’ny fotodrafitrasa takiana ho amin’izany.
Ny tetikasa PTASO dia mikendry ny fanalefahana ny fanafarana entana ara-pambolena voahodina, ny fanatsarana ny fiarovana ara-pahasalamana eo amin’ny sakafo eto Madagasikara ary koa ny fanatsarana ny fahaiza-manao eo amin’ireo mpamboly mpandraharaha. Tonga eo amin’ny dingana fametrahana ny vala indostrialy natokana ho an’ny fambolena (PAI) sy ny ivon-toerana natokana ho an’ny fandraharahana ara-pambolena (Guichet Unique Agricole) ao amin’ny Faritra Atsimo Andrefana. Tontosa omaly Talata 27 aogositra 2024 tetsy Ambohidahy ny fanaovan-tsonian’ny fifanaraham-piara-miasa eo amin’ny Minisiteran’ny Fampiroboroboana ny Indostria sy ny Varotra (MIC) sy ny Minisiteran’ny Fambolena sy ny Fiompiana (MINAE) izay mpiara-miombona antoka amin’ny fanatanterahana ny fametrahana ny vala indostrialy natokana ho an’ny fambolena (MIC) sy ny ivon-toerana natokana ho an’ny fandraharahana ara-pambolena (MINAE).
Andraikitry ny MIC hoy ny Sekretera Jeneraly, Ranoelimanana Rasamoely Vahinisoa Seheno, ny hijery ny fanodinana ireo vokatra ao an-toerana mba hampivoatra ny ara-toekarena ao amin’ny faritra Atsimo Andrefana amin’ny alalan’ny fanomezan-danja ireo vokatra ifotony. Ny MINAE kosa hitondra fanohanana ara-teknika sy fanamorana ny fampitaovana ireo tantsaha mpamboly ary hanamafy ihany koa ny fahaiza-manao eo amin’ny famokarana ireo vokatra hampitomboana ny fisian’ny akora haodina, hoy kosa ny Sekretera Jeneralin’ny MINAE Raharinomena Fanja.
Ny fisian’ny PAI sy ny ivon-toerana natokana ho an’ny fandraharahana ara-pambolena dia dingana sy trangan-javatra iray miantso ireo mpampiasa vola hisehatra ao an-toerana. Ary indrindra manampy ireo tantsaha mpamboly ny fisian’ny tetikasa ao amin’ny Faritra Atsimo Andrefana.