Vaomera misahana ny fanavaozana ireo lalàna momba ny fandraharahana (CRDA)

Ny momba ny fangatahana fanorenana Orinasa kaoperativa eny amin’ny tompon’andraikitra mahefa; ny fitsipika mifehy ny fivoriam-be fanorenana; ny fandidian’ny filankevi-pitantanana; ny fomba fanendrena sy fandidian’ny mpanara-maso ny Orinasa kaoperativa ; ny fiaraha-miasa eo amin’ny Orinasa kaoperativa sy ny Fanjakana ary ireo mpiara-miombon’antoka sns… Ireny rehetra ireny no ho voarakitra ao amin’ny volavolan-didim-panjakana fampiharana ny Lalàna vaovao mifehy ny Orinasa kaoperativa lah. 2023-016 tamin’ny 11 Aogositra 2023. Raha misy andininy 240 ny Lalàna momba ny Orinasa kaoperativa dia andininy 19 kosa no ho ao amin’ilay volavolan-didim-panjakana fampiharana.

Omaly Alakamisy 12 Septambra 2024, tetsy Antaninarenina, no nandinihan’ny CRDA ny momba ny rijan-teny nandrafetana izany volavolan-didim-panjakana fampiharana izany alohan’ny anolorana azy eo anoloan’ny Filankevitry ny Governemanta sy Filankevitry ny Minisitra. Nahitana ny Tale misahana ny Raharaha momba ny Lalàna (DAJ), ny Talen’ny Fampiroboroboana ny Fandraharahana sy ireo teknisiana mpiara-miasa ny ekipan’ny Minisiteran’ny Fampiroboroboana ny indostria sy ny Varotra (MIC) nandray anjara tamin’ny fivoriana. Teo koa ny Tetik’asa NCBA CLUSA izay mpiara-miasa akaiky amin’ny Ministera eo amin’ny sehatry ny fampiroboroboana ny Orinasa kaoperativa eto Madagasikara.